《迴響-粵語文化期刊-》2023年總期數第31期，經已正式出版。
◆文化專題：浪浪喵星人【新手上路！領養流浪貓、做貓義工】 今期貓出沒注意！ 衛斯理經典作品《老貓》揭露外星人侵略野心，可惜估算錯誤，被困黑貓身體成為千年老貓。 即使係啱啱出世嘅貓咪，都一樣係喵星人，人類對喵星人似乎有種不可抗力嘅法則，見到貓總會望兩眼。 同貓唔同命。 老貓喺古埃及被人當係神咁拜，中國貴族都有貓兒奴；貓店長保家衛國、吸引客人；就算普通人屋企有一兩隻貓都係好平常。 偏偏有人做得出遺棄寵物，甚至虐待、烹煮等等令人髮指嘅殘忍行為，命苦嘅流浪貓天生就要提高警覺行每一步。 生命有價，《迴響》相信人同人、人同貓之間總有緣份，浪浪喵星人面對嘅問題，值得更多人關注同了解。