因為本書冇版位，所以編者話轉喺網上寫。諗諗吓身處數碼時代，有啲嘢又真係可以網上做。
今次《韓國山寨漫畫讀本》可以出版香港中文版，純粹係一個偶然加巧合。舊年7月左右，作者大江老師同封面繪師大畑導演嚟咗香港，咁啱我搭枱，可以同兩位食飯飲酒吹水，咁就識咗兩位老師（當時勤勞嘅大江老師一路食飯仲一路Check緊呢本書嘅電子打稿），亦係我我第一次知道《韓國山寨漫畫讀本》呢本書，成為出版中文版嘅契機。
可能你會話，「山寨嘢有咩好睇？犯法喎，仲出書講？咁樣好咩？」。
當然我哋唔應該鼓勵侵權行為，但係要諗一件事，就係韓國嘅山寨漫畫產生於冇版權嘅年代。雖然山寨漫畫嘅存在本身係錯誤，不過人類應該係由錯誤中學習，正視發生過嘅事，就可以由錯誤中了解過去，認識現在。
今時今日韓國成為亞洲娛樂文化輸出國，當然唔會係無啦啦彈出嚟。背後有政策支持，又有大量創作者湧現。原來山寨漫畫時代，亦都培養咗一堆漫畫家、動畫師，喺韓國成形自給自足嘅內循環。同時，韓國亦係中國以外另一個外判製作中心。有技術、有創作人，韓國發展出韓流文化，只係時間嘅問題。所以肯正視錯誤，真係好重要。
喺某啲地區，山寨嘢係劣質貨、平嘢冇好嘅代名詞，但係喺韓國，山寨動漫其實好高質。韓國山寨漫畫有趣嘅地方係，佢翻版得嚟，又要避咗啲兒童不宜（暴力、色情）、日本文化（和服、兜襠布都唔出得街），又唔可以俾人知係日本嘢（書條都有寫，因為「倭色禁止」，凡係日本嘢都禁），所以一律加筆修改成韓國Style，加加吓，就係咁開始出現各種五花八門嘅韓國山寨漫畫，一啲你冇諗過嘅配搭都會出現。一邊睇住呢本書嘅介紹，會一邊覺得「咁都得？」，創意力量同幻想會嚇你一跳，但係又不得不佩服韓國人嘅諗頭。
其實香港以前都有老翻漫畫，亦有大量老翻漫畫由台灣、星馬一帶輸入。有啲年資嘅漫迷應該記得，以前睇嘅日本漫畫，唔知點解個個角色嘅名都係兩個字三個字嘅華人姓名（個人最記得嘅，例如大空翼→戴翅偉、冴羽獠→孟波、浦飯幽助→譚浩平），雖然心入面知道個角色係日本人，但係呢哋經過在地化咗嘅老翻，又會照食無誤，鬼叫嗰陣未有正版咩。韓國嘅情況都係一樣，啲角色改咗個韓國人名，連擬聲字、啲建築物招牌都變晒韓文，然後作者都變成韓國漫畫家，山寨得非常徹底。
睇完大江老師呢本《韓國山寨漫畫讀本》，除咗好似溫書咁重溫咗一啲日本動漫之外，亦都大開眼界，擴闊咗視野、了解多咗韓國文化。一本書滿足N個願望，幾好呀。
透過動漫接觸世界，咪就係宅文化勁嘅地方。
香港中文版 責任編輯 伊死
